English Site

Wednesday, June 27, 2012

نشرة أخبار المحاكمات العسكرية: يونيو 2012

نشرة أخبار المحاكمات العسكرية : يونيو 2012


المحاكمات العسكرية مستمرة
ظلم العسكر مستمر
الثورة مستمرة

بورسعيد
بعد قرار اتحاد الكرة ضد النادى المصرى ببورسعيد اتجمع الاهالى امام هيئة قناة السويس للإحتجاج بعدها الشرطة العسكرية قبضت على 16 شاب منهم وحاكمتهم عسكرى 8 طلعوا براءة و8 غيرهم لسه فى السجن ..كل عمليات القبض اللى تمت كانت عشوائية ..الـ 8 المحبوسين دلوقتى فيهم اللى بيشتغل فى الهيئة وفيهم المغترب وفيهم اللى كان بيجيب اكل من مطعم جنب مبنى القناة وفيهم اللى ساكن هناك وكان مروح فأتقبض عليه.
وفى 24 مايو اتقبض على احمد الدكرورى  من لجنته الانتخابية ببورسعيد وكان اول ضحايا قانون الضبطية القضائية عشان ضابط جيش قال ان شافه فى فيديوهات قضية "بورسعيد" .. احمد اتحاكم عسكرى واخد سنتين سجن .

خالد مقداد
خالد طالب عنده 19 سنة راح يطالب بحرية مصرى اتسجن فى السعودية قدام السفارة فأتقبض عليه واتحاكم عسكرى ومحبوس لست شهور بسجن برج العرب..خالد ادارة السجن رفضت حتى ان يحضر امتحان الثانوية العامة وفاتت عليه السنة.

العباسية

يوم الجمعة 4مايو اجتاحت  قوات الجيش محيط وزارة الدفاع واستخدمت العنف والضرب والقتل مع المتظاهرين و طاردتهم للعباسية واقتحمت مسجد النور لاعتقال المتظاهرين و قبضت على المصابين والاطباء بالمستشفات الميدانية ووصل عدد المعتقلين وقتها لـ 311 معتقل غير المفقودين ومع مرور الجلسات والتحقيقات افرج عن مجموعة منهم واتبقى 66 شاب لسه بيتحاكموا عسكرى فى قضية العباسية , منهم طفل قاصر اسمه اسلام محمد احمد 17 سنة اتقبض عليه من قدام محطة الدمرداش عند مسجد النور ..اسلام ماكنش فى الاعتصام وجوده فى المكان كان صدفة ورغم كده محبوس دلوقتى وبيتحاكم عسكرى .

يوم 20 مايو دخل المعتقلين فى اضراب مفتوح عن الطعام للمطالبة بالافراج عنهم و محاكمتهم امام القضاء المدنى ..كتير منهم فك اضرابه مع تدهور حالتهم الصحية .. هيثم محمد محمد هو السجين الوحيد اللى لسه مضرب عن الطعام من 20 مايو بسجن الاستقبال وصعد إضرابه يوم25 مايو..هيثم مضروب جامد من وقت اعتقاله وعنده جروح كتيرة متعالجتش ..هيثم قبل اعتقاله كان مخلص تجنيده كـ"ضابط احتياط" من 3 شهور..ودلوقتى مرمى فى سجون العسكر.

السويس
فى نفس الوقت وبعد احداث العباسية خرج السوايسة عشان يتضامنوا مع متظاهرى العباسية واتجمعوا قدام مبنى المحافظة .. الشرطة العسكرية قبضت على 8 متظاهرين منهم محمد غريب اللى اتقبض عليه من وسط زمايله فى المسيرة وقبل ما يوصل لمبنى المحافظة ولما اصحابه حاولوا ينقذوه اتضربوا واتحبسوا واتحاكموا عسكرى معاه ..نفس طريقة القبض العشوائى تمت هناك  فمن ضمن المحبوسين شاب  كان قاعد فى جنينة جنب المحافظة و واحد  كان قاعد على القهوة و واحد كان بيشترى اكل من مطعم جنب المحافظة .
محمد غريب وسبعه من زمايله مستنين الحكم عليهم يوم الاثنين 2 يوليو من المحكمة العسكرية بالسويس.

حياة هيثم وحرية خالد واحمد و الآف المسجونين  غيرهم متوقفة على تضامنا معهم ووقوفنا جنبهم .. ظلم العسكر مبيفرقش بين حد .. فى سجون العسكر الشيخ والدكتور والبياع والموظف والطفل والأم .. انشر قصصهم, تضامن 
معهم عشان نعرف نمنع المحاكمات العسكرية للمدنيين.

ساعدنا بطباعة تلك النشرة و البيان الذي نطالب فيه الرئيس المنتخب بالعفو عن كل ضحايا المحاكمات العسكرية, و وزعهم على معارفك و في الشارع و في أي مسيرة تشارك بها
لطباعة البيان  أضغط هنا
لطباعة النشرة اضغط هنا 

No comments:

Post a Comment